كلامها نزل على دماغه زي الميزان، لمعت في عينيه نظرة طمع وجبن، وحس إن كلامها فيه طوق النجاة لفلوسه ومظهره قدام الناس، متخيل إن كل حاجة هتمشي بالمسطرة والقلم زي ما خططوا في الضلمة.هز راسه بحماس ومسك إيد…
كلامها نزل على دماغه زي الميزان، لمعت في عينيه نظرة طمع وجبن، وحس إن كلامها فيه طوق النجاة لفلوسه ومظهره قدام الناس، متخيل إن كل حاجة هتمشي بالمسطرة والقلم زي ما خططوا في الضلمة.هز راسه بحماس ومسك إيدها وباسها وهو بيقول بنبرة خبيثة:ـ يخرب بيت عقلك.. مكنتش واخد بالي من الورطة دي كلها! صح، ترجع تتركن هناك تحت السيطرة لحد ما نقف على أرض صلبة ونعمل عمليتنا، وبعدها ابقى ارميها بورقة طلاقها في الوقت المناسب ومطولش مليم! أنا هبعت لها إنذار رجعة رسمي على يد محضر وأحطها قدام الأمر الواقع.
تاني يوم الصبح، كنت قاعدة في مكتب الأستاذ ممدوح المحامي، والورق كله مفروش قدامنا على المكتب، وبنشرب الشاي وأنا بحكي له كل تفصيلة بهدوء وتركيز عمري ما عشته قبل كده. كنت باصة للقايمة ومؤخر الصداق وكل وصل وأمانة معايا، وجوايا يقين إن الست لما بتقرر تاخد حقها بالقانون مفيش قوة تقف قدامها.المحامي ابتسم وهو بيقفل الملف وقال بثقة:ـ متقلقيش يا مدام سهيلة.. إحنا كده مظبطين كل حاجة، قضية نفقة زوجية ونفقة صغار وأجر مسكن، وقضية تبديد منقولات زوجية بالقايمة اللي توديه في داهية وتعمل عليه حكم حبس لو فكر يماطل، ده غير تمكينك من الشقة لوحدك وبحكم محكمة مستعجل عشان إنتِ الحاضنة للولد.
وانا لسه بقوم من على الكرسي، تليفوني رن، وكان البواب بتاع العمارة بصوته المهزوز:ـ يا مدام سهيلة، في محضر واقف تحت الشقة ومعاه ورقة بيقول إن الأستاذ جوزك باعتها، ومستني حضرتك عشان تستلمي إعلان رجعة لبيت الطاعة!بصيت للمحامي وابتسمت ابتسامة هادية كلها ثقة وبرود، وقولت للبواب في التليفون:ـ خليه يستناني خمس دقايق يا عم إبراهيم، أنا جاية استلم بنفسي.. وقول له يجهز القلم، عشان الرد هيوصله أسرع مما يتخيل!وصلت العمارة بخطوات ثابتة وراسي مرفوعة لفوق، لقيت المحضر واقف مستني عند المدخل مع عم إبراهيم البواب.
قربت منه بكل هدوء، استلمت الإنذار ومضيت عليه ببرود تام، وبصيت للورقة اللي متخيل إنه هيرجعني بيها حظيرته تاني ويكسر شوكتي عشان يوفر قرشين لمراته الجديدة.المحضر بصلي باستغراب من هدوئي، شكرته ومشيت، وطلعت شقتي وقعدت مع ابني وأنا بقرأ الإنذار كلمة كلمة وأنا بضحك في سري على غبائه، فاكر إن اللعبة هتفضل دايرة على مزاجه وميعرفش إن القانون بيحمي اللي يعرف يستغل حقه صح وميفرطش في كرامته.
تاني يوم على طول، كان الأستاذ ممدوح المحامي مقدم في المحكمة دعوى اعتراض رسمي على إنذار الطاعة، موضح فيها سوء عشرته وعدم أمانته وطردي من البيت، ومعاها دعوى نفقة زوجية ليا ونفقة لصغير تليق بدخله وتوجع جيبه، وطلب تمكين مشترك من شقة الزوجية بصفتي زوجة وحاضنة، ده غير إنذار رسمي بتسليم قائمة المنقولات الزوجية بالكامل لمنع أي تلاعب في عفشي.في نفس الوقت، كان هو قاعد مع مراته الجديدة في عيادة دكتور الحقن المجهري، ماليين الصالة غرور ومستنيين يحددوا بروتوكول العملية ويبدأوا خطوات التوأم، وفاكرين إنهم أمنوا ضهرهم وربطوني بإنذار الطاعة.وهو قاعد حاطط رجل على رجل ومبتسم، تليفونه رن برقم غريب.
رد بنبرة متعالية:ـ ألو.. مين معايا؟ـ ألو يا أستاذ وائل؟ معاك محضر محكمة الأسرة، بنبلغك بوجود دعوى اعتراض على إنذار الطاعة مرفوعة ضدك من زوجتك سهيلة، ومعاها قضايا نفقة زوجية وصغار، وإنذار رسمي بخصوص قائمة المنقولات الزوجية!الدم هرب من وشه فجأة، والتليفون كان هيقع من بين صوابعه، عيونه برقت برعب ولسانه اتقل، وبص لمراته اللي كانت بتبص له باستغراب وشك، وسألته بحيرة: “في إيه يا وائل؟
وشك اتخطف كده ليه ومين اللي على التليفون؟!”قفل الخط وهو حاسس إن ودانه بتصفر، والعيادة كلها بتلف بيه. بص لمراته الجديدة وهو بيبلع ريقه بصعوبة، وصوته طالع مهزوز ومخنوق:ـ السنيورة يا ستي.. مقدمة اعتراض على الطاعة ورافعة عليا قضايا نفقات وإنذار بقايمة العفش كلها!مراته رجعت ضهرها لورا واتبدلت ملامح الدلع لغضب أعمى وشرارة بتطق من عينيها:ـ اعتراض ونفقة وقايمة؟
! يعني الخطة اللي رسمتها بوظتها بغبائك؟! مش قولتلي إنها ملهاش ضهر وهتخاف وترجع تبوس إيدك؟!زعق بصوت واطي عشان الناس في العيادة، وهو حاطط إيده على دماغه:ـ وأنا هعرف منين إنها هتروح لمحامي وتعمل كل ده في يوم وليلة؟! دي بتطالب بنفقة زوجية ونفقة للواد بمبالغ تكسر الضهر، غير إنها حاطة القايمة في الزور!في اللحظة دي، نادت الممرضة عليهم تاني:ـ أستاذ وائل.. اتفضلوا للدكتور، وحضرتك محتاج تدفع مقدم العملية في الخزنة عشان نبدأ البروتوكول من النهاردة.
بصت له مراته الجديدة بنظرة جامدة كلها طمع وقسوة، وقالت بصوت مفيش فيه ذرة رحمة:ـ قوم ادفع يا وائل.. ملكش دعوة بقضاياها دلوقتي، العملية دي هتتعمل يعني هتتعمل، وفلوسي وحلمي بتوأم مش هيضيعوا عشان خاطرها، اتصرف وادفع من حسابك اللي في البنك!بص لها بذهول، كأنه أول مرة يشوفها على حقيقتها، وشاف الجشع اللي مالي قلبها وهي شايفة مصيبته ومش فارق معاها غير مصلحتها وفلوسها.وقف وهو متوتر، ومشي خطوتين ناحية الخزنة وطلع الفيزا وإيده بتترعش، وجواه نار بتاكل فيه وهو حاسس إنه بقى بين فكّين كماشة: مهدد بالحبس وخسارة كل مليم في المحاكم، ومربوط بست متطلبة مش شايفة فيه غير بنك متحرك يحقق لها رغباتها.
دفع المبلغ المطلوب في الخزنة وإيده بتترعش، وكل مليم كان بيتخصم من حسابه كان بيحسه كأنه بينتزع من روحه. الدكتور حدد لمراته جدول الحقن والمنشطات، وهي خارجة من العيادة طايرة من الفرحة ومبتسمة ابتسامة نصر، كأن الدنيا كلها ملك إيديها، ولا كأن الراجل اللي جنبها على شفا حفرة من الإفلاس والسجن.أول ما ركبوا العربية، بصت له ببرود وسألته:ـ هتعمل إيه بقى في المصيبة اللي سهيلة عملتها دي؟
لازم محامي شاطر يوقف المهازل دي فوراً، أنا مش هقبل إن نص فلوسك تروح لنفقات وقوايم وإحنا محتاجين كل قرش لولادي!رد عليها بنفاد صبر وخنقة مكتومة:ـ هشوف محامي.. هشوف محامي بكرة يلم الموضوع ده بأي شكل، إنتِ فاكرة القوايم والمحاكم دي لعب عيال؟! دي لو حكمت بحبس في القايمة هضيع فيها وأتسجن!في نفس الوقت، كان الأستاذ ممدوح بيكلمني في التليفون بنبرة مريحة جداً:ـ اطمني يا مدام سهيلة.. موقفنا سليم مليون في المية، دعوى الاعتراض على الطاعة اتقيدت في الجدول ومعاد الجلسة اتحدد، ونزلنا بإنذار القايمة رسمي على يد محضر.
هو دلوقتي قدامه خيارين ملهومش تالت؛ يا يسلّم العفش سليم بالشوكة والسكينة، يا إما هيدخل في دوامة جنحة تبديد وعقوبتها الحبس.قفلت التليفون وبصيت لابني اللي كان بيلعب بسلام في الصالة، وأول مرة من فترة طويلة أحس براحة نفسية حقيقية وسلام داخلي، حسيت إني استرديت هيبتي وكرامتي اللي كان ناوي يدوس عليها.عدت أيام قليلة، وبدأت مراته تاخد كورس الهرمونات والمنشطات المكثفة استعداداً لسحب البويضات، بس مع الهرمونات دي بدأ وائل يشوف وش تاني خالص؛ العصبية، والطلبات اللي مابتخلصش، والصوت العالي على أتفه الأسباب. وفي نفس اليوم اللي راح فيه يقابل محامي عشان يدافع عنه في قضايايا، المحامي صدمه بالواقع وقاله بالحرف:ـ موقفك القانوني ضعيف يا أستاذ وائل.
